KALIBO, Aklan — Bangud sa mainitan nga diskusyon ro naging ugat it brutal nga kamatayon it sangka 34-anyos nga mangingisda matapos nga tadtaron it pagbuno it anang kainuman sa Sitio Bato, Brgy. Ochando, New Washington, hapon it Lunes sa selebrasyon it kapistahan ni Sr. San Juan de Bautista.
Nakaangkon it ap-at nga igo it pagbuno ro biktimang si Elito Sauza, residente it nasambit nga lugar nga nagresulta sa anang hinali nga kamatayon samtang ro suspek nga naaresto it mga awtoridad hay si Jomar Arguelles, 42 anyos, residente it Brgy. Dumga, apang temporaryong naga-istar sa Brgy. Poblacion, Makato.
Suno kay Ernesto Sauza, ama it biktima nga grabe ro anang kakibot matapos sugiran nga napatay ro anang unga.
Ginasugid nga gusto eon nga mag-uli it suspek sa banwa it Makato bangud nga gina-usoy eon ro motorsiklo nga anang ginhueam apang pilit raya nga ginahawiran it biktima hasta nga nakaangkon it mainitan nga diskusyon.
Gulpi sigon nga nag-gabot it kutsilyo ro suspek ag ginbuno ro biktima sa anang kilid ag dughan samtang nagapa-agto sa andang natungdan nga mga motorsiklo.
Nakadaeagan pa raya ag kat nadusmo hay ginbuno pa it daywang beses sa likod ni Arguelles.
Nasayuran nga ro suspek mismo ro nag-presentar nga maghatud sa biktima sa New Washington halin sa banwa it Makato ag bangud nga selebrasyon it San Juan hay nagsaeampitan anay sanda nga mag-inuman sa baybay.
Bangud sa insidente, desidido nga magpasaka it kaso ro pamilya Sauza.
Samtang, naghana pa nga magpaeagiw ro suspek paagto sa direksyon it Brgy. Cawayan, apang naaresto it mga katapo it Barangay Peace Action Team (BPAT) ag New Washington PNP.
Narekober sa anang posesyon ro kapin sa 10 pulgadang haba it kutsilyo nga gingamit sa krimen.
Nakakulong makaron sa custodial facility it New Washington PNP ro suspek para sa nagakaigo nga disposisyon .
