KALIBO, Aklan—Nakakulong eon ag magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro daywang ka indibidwal matapos nga madakpan it illegal nga droga sa ginkasa nga drug buy-bust it gintingob nga pwersa it Ibajay Municipal Police Station ag Provincial Drugs Enforcement Unit ukon PDEU Aklan sa Sitio Pangpang, Barangay Laguinbanwa sa banwa it Ibajay.
Ginkilaea ni P/Major Jerome Manahan, hepe it PDEU it Aklan Provincial Police Office ro mga suspek nga sanday “alyas Koranek” it Brgy. Bago, Roxas City ag “alyas Poloy” it Brgy. Rizal, Ibajay ag puro mga construction worker.
Nabak-ean ro mga raya it sangka sachet it suspected shabu kabaylo it buy-bust money nga P8,000 pesos.
Samtang, sa pagbody search sa mga raya hay nabuoe dugang it pulisya ro an-om nga sachet it suspected shabu ag dugang pa nga tatlong sachet it suspected marijuana leaves.
Sa pag-imbestiga it mga pulis, ginpahayga ni P/Major Manahan nga gin-ako sigon ni “Alyas Koranek” nga sa syudad it Roxas naga halin ro anang supply ag naga-adto eamang raya sa banwa it Ibajay, sang beses sa sueod it sang dominggo ag nagatenir it haeos daywang adlaw bago matapos ro anang transaction.
Sa makaron hay ginauisa pa it pulisya ro posibleng mga connection it suspek sa nasambit nga banwa agud nga matapna eon ro pagkalhit it illegal nga droga.
