NEW WASHINGTON, Aklan—Nagtuga it mabahoe nga kapyerdihan sa pangabuhian ag pangitan-an it sangka mangunguma matapos nga tinakaw ro daywang ka makina it anang turtle nga pang-arado sa eanas sa Barangay Jugas, New Washington.
Posible suno kay Pastor Masangya nga natabo ro insidente it sa kasagsagan it pag-inuean kon sa siin natigayon gid nga natakaw ro makina nga nakakabit sa kaha it turtle ag haom eon kunta nga i-arado sa eanas sa nasambit nga lugar.
Ginpahayag dugang nga uwa it nakit-an nga bakas it siki sa eanas kon sa siin ro kada unit it makina hay sarang nga mahakwat it sangka tawo.
Kapin sa 100 meters ro kaeayuon it nahamutangan it turtle maghalin sa andang panimaeay rason nga inde mataeopangdan kon may nagadistrungkar sa kagamitan.
Agahon eon suno kana kat nataeopangdan it anang mga operator nga uwa eon nakakabit ro makina sa mismong kaha kara nga nagdaea it kasubo sa natungdan bangud sa raya ro nagapanguna nandang pangitan-an.
Suno pa kay Masangya nga posibleng daywa hasta sa tatlong katawo ro naghimo it pagpanakaw.
Bangud kara, haom imaw nga magtao it pabuya nga tig-sangka sako nga bugas nga naga-bug-at it 50 kilos sa posibleng makaturo sa suspek.
Engkaso gidman nga ibaligya ro nasambit nga gamit, naga-apela si Masangya nga inde pagbak-eon bangud sa raya hay tinakawan ag ireport eagi sa pinakamaeapit nga estasyon it pulisya, barangay council ukon kanda mismo makipag-angot.
