KALIBO, Aklan—Nagapadayon ro search and rescue operation it Philippine Coast Guard sa ginapahayag nga napueong indibidwal nga missing maghalin sa 20 nga sakay it daywang ka fishing boat nga nagtik-eob sa kaeawran sa tunga it Caluya, Antique, Isla it Boracay ag Carabao Island.
Ginpahayag ni Coast Guard Lieutenant Junior Grade John Laurence Banzuela it Philippine Coast Guard Aklan nga naghalin ro naeogdang nga baroto sa Angol Point, Brgy. Manoc-manoc sa isla it Boracay ko adlaw it Lunes.
Apang, pag-abot sa nasambit nga kaeawran hay naagyan it mga raya ro kanas-kanas ag ginhampak it mga mabaskog nga baeod ro andang baroto nga nagresulta sa pagtik-eob kara.
Ginausisa pa nanda kon minatuod nga naunang nagtik-eob ro sambilog nga baroto ag ro pangaywa hay ginhana eamang sanda nga buligan apang natigayon man nga nadisgrasya.
Ginkilaea ro mga sakay nga na-rescue nga sanday Rhea Devera; Jarenz Bernal; Joseph Terelyos; Frederick Lompero; Luisa Ojano; Alvin Salodes; Arnold Terelyos; Gary Patricio ag si Jonald Patricio nga imaw man ro boat captain.
Base sa andang inisyal nga imbestigasyon, kapin sa 20 eamang ro kabilugan nga pasahero it daywang ka baroto kon sa siin napueong ka mga sakay kara ro natigayon nga naeowas ag presenteng ginpaidaeom sa medical check-up sa District Hospital it Romblon ag ro iba sa mga raya hay nagapabilin sa Local Disaster Risk Management Office it Romblon.
Nag-apela si Banzuela nga kon may mga nakit-an ukon nataeopangdan nga mga tawo nga nagapangayo it bulig hay mahimo sanda nga buligan ag ipaabot kanda insigida ro impormasyon.
Ginpanugyan nana sa tanan nga kon mabaskog ro baeod sa kaeawran hay inde eon mag-eayag pa para sa andang kaeowasan.
