KALIBO, AKLAN – – – Acts of lasciviousness ro kasong gina pangatubang it daywang ka mga costumer it sangka resto bar matapos magpanghulikap it daywang ka mga waitress ag magkrear it kinagamo.
Gina sugid nga natabo ro insidente sa sangka resto bar nga nahamtang sa Brgy. Tabangka, Numancia matapos gina alegar nga nag abot sa lugar ro mga suspects nga gin kilaea kanday Baldomero Torres, 30 anyos, residente it Tina, Makato ag Michael Gonzales, 32 anyos, residente it Cajilo, Makato ag naobserbahan nga sa impluwensiya it makahieilong nga ilimnon.
Nag order sigon ro daywa it sangka bucket it beer ag ladies drink para sa babayeng gin table.
Apang, gulpi eamang nga gin buytan ni Baldomero ro dughan it babaye nga nagresulta agud maakig raya ag gin kumpronta ro mga suspects.
Naakig man sigon ro daywa ag gin pangtumba ro mga bangko ag lamesa.
Bangud kara rason nga nagpaeapit ro sambilog pang waitress agud sukton ro daywa sa andang kueang sa bayad apang, sa baylu nga magbayad gina alegar nga gin buytan kara ro maselan nga parte it eawas it nasambitan nga waitress.
Natigayun man nga matapna ro kinagamo matapos nga magresponde ro mga katapo it Numancia PNP nga nagresulta sa pagkaaresto ag pagka-presu it nasambitang mga persona.
