NATIONAL News — Magiging masadya ro mga empleyado it gobyerno nga nagahueat it andang year-end bonus ag cash gift para sa holiday season.
Raya hay matapos nga aprubahan it Department of Budget and Management (DBM) ro tempranong pagpaguwa sa year-end bonus ag cash gift it mga kuwalipikadong empleyado it gobyerno.
Base sa ginpaguwa nga memorandum circular no. 2024-3 ag may petsang Oktubre 22, gin-amiyendahan ro circular no. 2016-4 sa pagbayad it year-end bonus it mga empleyado it gobyerno nga katumbas it sang buean nga basic pay ag cash gift nga P5,000 bangud sa obserbasyon nga kon madelay ro pagbaton it bonus ag cash gifts hay nakaka-apekto sa morale, motivation ag lebel it pagtrabaho it mga trabahador it gobyerno.
Sa nagtaliwan nga mga dinag-on, ro year-end bonus ag cash gift hay ginatau kada Nobyemre 15.
Bangud kara, pagaeauman nga mas magiging temprano eon ro pagbaton it year-end bonus ag cash gift it mga empleyado it gobyerno nga kuwalipikado base sa gintaeana nga sueundanan it DBM.
