NATIONAL News — Gin-akusahan it Pilipinas ro Chinese Coast Guard it pag-eabag sa laye ag agresibong maniobra sa West Philippine Sea (WPS) nga nagresulta sa pagbueungguan nga nagtuga it kahalitan sa daywang barko it Philippine Coast Guard (PCG).
Nauna eon nga ginpahayag ni CCG spokesperson Gan Yu sa social media platform nga Weibo nga ro mga saeakyang pandagat it Pilipinas nga BRP Bagacay ag BRP Cape Engaño hay ginhungod nga ginbunggo sa sangka barko it CCG maeapit sa Escoda Shoal.
Apang sa pihak it nasambit nga mga insidente, ro parehong PCG vessels hay nagapabilin nga nakatutok ag nagpadayun sa andang misyon nga maghatud it mga importanteng suplay sa mga tawuhan nga naka-assign sa Patag ag Lawak Islands.
Kan-o eamang hay nagdihon it pormal nga protesta ro Chinese Foreign Ministry sa presensya it barko it Pilipinas nga BRP Teresa Magbanua sa Escoda Shoal.
Ro Escoda Shoal, nga ginatawag man nga Sabina Shoal hay makit-an sa 75 nautical miles ukon masobra sa 140 kilometro halin sa Palawan ag sa sueod it 200-nautical-mile exclusive economic zone (EEZ) it Pilipinas.
Ro BRP Teresa Magbanua hay naka-istasyon sa Escoda Shoal umpisa ko Abril sa tunga it mga report it aktibidad sa reclamation it China sa lugar.
Gin-engganyo it NTF-WPS ro pagiging kalmado ag magsunod sa United Nations Convention on the Law of the Sea ag iba pang gina-angot nga mga internasyonal nga laye agud nga malikawan nga mas pang mag-grabe ag masiguro ro kaeowasan it tanan nga mga saeakyang pandagat nga naga-agi sa rehiyon.
Sa pihak it mga pag-istorya para sa de-escalation, nagapadayun ro tensyon sa WPS sa tunga it maeapnagon nga pag-angkon it China sa South China Sea.
