KALIBO, Aklan—Bangud sa madasig nga pagpadaeagan ag madanlog nga daean tuga it maueanon nga panyempo, sangka delivery truck naaksidente bandang ala 1:40 kaina it hapon sa pakurbada nga porsyon it Brgy. Poblacion, Nabas.
Suno kay PSSg Melvin Alba it Nabas Police Station, ginkilaea ro driver it behikulo kay Jerry Agustin kung siin kaibahan kara ro sangka helper nga si Alvin Isita, parehong residente it Salinungan East, San Mateo, Isabela.
Maghalin sigon sa syudad it Ilo-ilo ro nasambitang truck matapos sandang mag-unload it andang karga nga binhi it paeay ag magapaadto eon kunta it Brgy. Caticlan sa banwa it Malay.
Ginpahayag dugang ni PSSg Alba nga gulpi eamang nadueaan it kontrol sa pagmaneho si Agustin pag-abot sa nasambitang lugar rason nga dumiretso ro behikulo sa sangka kurae nga himo sa kawayan kamana man nga nadaeasa pati ro street light ag sangka puno it indian mango.
Sa mayad nga swerte hay owa mat-a it naninahan kasunod it insidente.
Sa makarun hay sa paghinakop eon man it Nabas Police Station ro daywa para sa nagakaigo nga disposisyon.
