Kalibo Aklan ——–Eumapaw sa concrete barrier it Caticlan Jetty Port ro sangka delivery van kahapon pasado alas 12:00 it udtro-adlaw.
Ro nasambitang behikulo hay may maghalin sa bahin it Mindoro ag may kargang asin nga ginamaneho ni Manuel Labrador, 38-anyos, tumandok it Pandi, Bulacan.
Base sa report, sakay it sangka roro vessel ro delivery van ag nagapanaog eon kunta kat aksidenteng sumagi ro airtank kara sa rampa it barko.
Bangud kara, owa eon nakontrol it driver ro manubela kabangdanan nga eumapaw raya sa concrete barrier it pantalan.
Maswerte man nga owa raya natigayun nga mahueog sa baybay kamana man nga owa it nahalitan.
Kaangot kara, gintinguhaan man it mga otoridad nga bue-on ro mga kargang asin ag ginsaylo sa kaparehong behikulo antes raya ginhakwat gamit ro crane.
Ro insidente hay ginapakamayad lang nga ginparecord para sa nagakaigo nga disposisyon.
