KALIBO, Aklan–Nagapabilin pa nga balanse ro demand ag suplay it baboy sa bilog nga probinsya it Aklan.
Raya hay sa pihak nga 13 eon nga banwa ro nakalista it kaso it African Swine Fever ukon ASF.
Suno kay Engr. Jun Agravante, presidente it Livestock, Hog and Poultry Association sa Aklan nga mabahoe ro posibilidad nga magtaas ro presyo it karne it baboy it hasta P300 sa mga masunod nga dominggo.
Raya hay bangud sa ginaeauman nga pagkaubos it mga alagang baboy sa bilog nga probinsya.
Kadungan kara, aminado si Engr. Agravante nga maabu nga mga hog raiser ro nahadlok nga ipa-test ro andang mga alagang baboy bangud sa pagkabaeaka nga ipaidaeom raya sa culling engkaso nga magpositibo sa ASF.
Nagaeum man imaw nga matapos eon it pagbayad it gobyerno probinsyal ro mga apektadong hog raiser sa mas madali nga panyempo.
