KALIBO, Aklan — Nagdeklara eon it dengue outbreak sa bilog nga probinsiya it Aklan.
Suno kay Aklan Governor Florencio Miraflores, raya hay bangud sa padayun nga pagtaas it kaso it nasambit nga sakit sa probinsiya.
Nasayuran nga naga-abot eon sa 2,171 ro kabilugan nga kaso it dengue sa probinsiya umpisa Enero 1 hasta Hulyo 6 it makaron nga dag-on, nga kon sa siin, 15 kara ro namatay.
Ginpaathag pa it gobernador nga ginalikawan nanda nga magdeklara it state of calamity bangud sa posibleng maging epekto kara sa industriya it turismo sa Aklan eabi eon sa isla it Boracay nga ginadayo it mga lokal ag dumueuong nga turista.
Pwede eon sigon nga magamit makaron ro 70 porsiyento it calamity fund para sa risk reduction expenditures.
Bangud kara, ginmandu it Provincial Health Office (PHO)-Aklan ro maeapnagon nga paglimpyo sa palibot agud nga matapna ro mga namok nga nagdaea it dengue.
Samtang, bangud punuan eon ro isolation ward it Aklan Provincial Hospital, tatlong pribadong ospital sa Kalibo ro nakataeanang magapirma sa Memorandum of Agreement (MOA) agud nga batunon ro iba pang pasyenteng apektado it nasambit nga sakit, kun sa siin, ro lokal nga gobyerno ro magasabat sa andang hospital bill.
