KALIBO, Aklan— Kapin pang pagahugton it Department of Environment and Natural Resources (DENR) ro pagpatuman it laye sa palibot ag mga regulasyon makaron nga dag-on agud mapabilin ro gin-umpisahang rehabilitasyon sa isla it Boracay nga gindayaw it kaeabanan ag iba pang mga accomplishments it ahensiya ko nagtaliwan nga dag-on.
Raya ro naging mensahe ni Environment Secretary Roy Cimatu sa tradisyunal nga DENR New Year’s Call, kon siin nagtipon-tipon ro tanan nga mga opisyal ag empleyado it ahensiya.
Dikara gin-anunsyo ro policy direction it ahensiya ag nagtaeana it mga importanteng programa ag proyektong igapatuman makaron nga 2019.
Ginpabugae ni Cimatu nga ro paglimpyo ag rehabilitasyon sa Boracay, sambilog sa mga sikat nga tourist destination sa nasyon ro andang “centerpiece” it mga naging accomplishments ko 2018 kabulig ro iba pang miyembro it Boracay Inter-Agency Task Force.
Mag-eowas sa Boracay, natistingan eon man sigon kara ro andang ikasarang sa iba pang nagapangunang ecotourism destinations kaparehas it El Nido ag Coron sa Palawan, Panglao Island sa Bohol ag Puerto Galera sa Oriental Mindoro.
Bangud sa madinaeag-on nga paglimpyo sa Boracay, masunod sigon nanda nga igapaidaeom sa rehabilitasyon ro Manila Bay nga ginakabig nga mabahoe nga target makaron nga dag-on.
