KALIBO, Aklan—Nagpaguwa it uman ro Department of Environment and Natural Resources (DENR) it dugang nga guidelines sa pagbutang it Sewage Treatment Plant (STP) matapos hinyuon it mga negosyante ro mas klaro nga sueondanan kaangot kara.
Sa DENR Memorandum Order No. 2018-752, nakabaehag nga ro tanna nga mga hotel nga may 50-rooms pataas hay kinahang-eang tapuson ro STP antes ro re-opening ko Isla it Boracay sa Oktubre 26 it presenteng dag-on.
Ro mga hotel ukon resort nga may 30-49 rooms hay ginapasugtang matapos hasta it Nobyembre 30, 2018 ro clustered ukon individual STP.
Sa katapusan it dag-on, Disyembre 31 man ro deadline nga gintaenaa para sa mga maintok nga resort nga may 6-29 rooms samtang sewer connection ukon service sa presenteng water provider ro ginapatuman para sa 5 rooms panaba.
Samtang, ginkumpirma it DENR nga pasugtang mag-operate sa uman nga pagbukas it isla ro mga hotel ukon resort nga may 6-49 rooms samtang ginaobra ro andang STP sa kondisyon nga konektado ro mga raya sa sewer line ag nakapasa sigon sa Class SB standard it ahensya.
Sa pihak nga parte, may dugang pang sang buean para sa mga business owners engkasong inde matapos sa gintaeanang tyempo ro pagbutang it STP nga nagapangunang requirement sa pagproseso it mga permits ag clearances.
Nauna eon nga gin-insister DENR nga maga-isyu eamang sanda it environmental permits ag clearances oras nga masunod ro mga requirements ag sueondanan it ahensya.
