Ginapreparahan makarun it Department of Education (DepEd) Aklan ro mga distance learning modalities nga andang igapatigayun para sa mga estudyante sa pagbukas it klase sa Agosto 24, 2020.
Suno kay Assistant Schools Division Superintendent Jose Niro Nillasca it DepEd-Aklan, nga naga-abot eon sa haeos 99% ro enrollment halin sa kindergarten hasta it Grade 12 halin ko Hunyo 1 hasta Hulyo 15 nga enrollment period sa bilog nga probinsya it Aklan.
Kaangot kara, nagpahaum eon man sigon ro mga eskwelahan sa it Learning Continuity Plan (LCP) para sa pagpatigayun it distance learning kon sa siin ginakaeakipan raya it modular, online, radio base instruction, television base instruction ag blended learning.
Nadesisyon man sigon it ahensya nga sa unang dominggo it pagbukas it klase hay syento porsyento it mga eskwelahan sa Aklan hay modular ro pagagamiton sa pagtinuean-an agud nga may buytan nga learning resources ro mga learners.
Samtang, ginpaathag man ni Nillasca nga on going eon ro reproduction it mga modules nga andang igatao sa mga estudyante.
Agud mapadasig ro pag-reproduce hay ginhueay-hueay sigon sa mga eskwelahan ag division office ro mga modules.
Ro maintenance and other operating expenses ro pagagamiton it kada eskwelahan agud mapondohan ro pag-imprinta.
Dugang pa kara, nagapadayun sigon makarun ro sang dominggo nga dry run it nagkasari-sari nga modalities kung siin may gin-assign sanda nga eskwelahan nga maga-dry run it radio ukon TV base instruction, online, modular ag blended learning.
Ro resulta sigon kara hay masayran sa adlaw it Biyernes.
Dapat sigon nga maging haum ro mga ginikanan ag ro komunidad sa bag-ong mode it pagtinueon-an para sa new normal.
