Igalunsar it Department of Education (DepEd) ro “My Buddy System” sa mga eskwelahan agud nga pabaskugon ro mental health ag psychosocial support it mga estudyante.
Sa idaeum it programa, iga-pares ro mga estudyante ukon magabilog it maisot nga grupo agud nga makaangkon sanda it eowas nga espasyo para magkumustahan, magpa-utwas it andang mga ginakabaeak-an ag magtau it suporta sa kada isaea.
Nakabase ro sistema sa big brother/big sister model, kun sa siin maga-giya ro mas magueang nga estudyante sa mga mas bata.
Suno sa DepEd, kaparte ro programa it mas maeapad nga kampanya para sa kaeowasan it mga estudyante ag ginlunsar raya bilang pagdumdum sa National School Safety Week.
Tuyo man kara nga engganyuhon ro mga estudyante nga indi magduha-duha nga magpangayo it bulig kon maka-eksperyensiya it problema ukon magakinahangean it emosyonal nga suporta.
