KALIBO, Aklan—Nagapahaom eon ro Department of Education (DepEd) sa pag-imprinta it mga modules nga imaw ro sambilog sa mga pagagamiton nga learning system makaron nga school year 2020-2021.
Suno kay Assistant School’s Division Superintendent Jose Niro Nillasca it DepEd Aklan nga uwa it face to face learning nga matabo sa pagbukas it klase sa Agosto 24 sa baylo, igapatuman ro distance learning pinaagi sa modular learning; radio based instruction; tv based instructions; online learning; ag blended learning.
Ginpaathag nga sa syento porsyento nga learning competencies hay 40 porsyento ro igaproduce kon sa siin ginpili ro pinaka-importante nga pwedeng ituro sa mga estudyante sa tunga it ginapangatubang nga pandemya.
Ginhueag it DepEd ro andang pondo kabulig ro mga lokal nga gobyerno para maka-produce it nagakaigong modules para sa mga learners nga sa andang baeay eamang sanda magatuon.
Kaangot kara, naga-usoy man sanda it learning facilitator kaparehas it barangay officials, mga educators graduate ag iba pa para maihatod sa mga estudyante ro nagakaigong pagtinueon-an makaron nga tyempo.
Kinahang-ean sigon kara ro bulig it mga ginikanan agud nga magkaantiguhan ro andang mga onga.
Bukon sigon it tanan hay igapaagi sa modular learning kundi una man ro radio ag tv base instruction kon sa siin nagpaguwa sigon it mandato ro National Telecommunications Commission ukon NTC nga mag-alokar it oras ro tanan nga radio ag tv stations sa DepEd agud nga makadeliver it nagakaigong pagtinueon-an.
Ginaeauman man it opisyal nga inde maduea ro problema sa pag-umpisa it klase apang haom sigon sanda nga suk-ean raya para maihatod it husto ro maayos nga pagtinueon-an sa mga estudyante.
