KALIBO, AKLAN — Epektibo makaron nga adlaw, ginpatuman ro tatlong bueang preventive suspension kontra kay Dr. Jessie Gomez, schools division superintendent it Department of Education (DepEd)-Aklan kaangot sa reklamong Grave Misconduct Through Sexual Harassment.
Ro mandato hay naghalin kay DepEd secretary Leonor Briones.
Ginkasuhan ni John Mark Pelayo, sangka job order nga emergency clerk/driver it DepEd-Aklan si Dr. Gomez matapos sigon imaw nga suguon nga imasahe ro anang alima, abaga ag dughan ag ginhana pa sigon nga pabuytan ro maselang parte it eawas kara.
Gindihon it biktima ro reklamo sa Aklan Prosecutor’s Office ko Hunyo 3, 2016, apang ginpanaba sigon raya sa unjust vexation.
Sa interview it Bombo Radyo, ginpaathag ni Dr. Gomez nga katuyuan it nasambitang suspension order nga inde maimpluwensiyahan ro ginapatigayong imbestigasyon kaangot sa kaso.
Ginpamalibaran ni Dr. Gomez ro alegasyon ag haom sigon imaw nga atubangon ro kaso sa korte.
Mag-eowas sa kasong kriminal, nagapangatubang man si Gomez sa kasong administratibo.
