Nagapahaum eon ro Department of Education ukon DepEd Region 6 para sa pagahiwaton nga mass oath-taking it kapin sa 8,493 nga newly promoted teachers ag principals halin sa Western Visayas nga pagapatigayunon sa probinsiya it Capiz.
Sa pihak kara, ginklaru ni DepEd Region 6 spokesperson Hernani Escullar Jr., nga gina-finalize pa nanda ro pilang detalye sa central office eabi eon ro petsa it nasambit nga event.
Pagahiwaton ro seremonya sa Villareal Stadium sa Roxas City nga ginaeauman nga pagatambungan it linibu nga mga participants.
Kaibahan sa mga magatambong ro mga bag-ong na-promote nga manugturo halin sa nagkaeain-eain nga Schools Division Offices it Capiz, Aklan, Antique, Guimaras, Iloilo, Iloilo City, Passi City, ag Roxas City.
Dugang pa ni Escullar nga posibleng raya eon ro sambilog sa pinakamabahoe nga mass oath-taking para sa mga manugturo sa bilog nga nasyon.
Kaeakip suno kana sa mga ginatutukan makaron hay ro logistical preparations agud nga masiguro ro maayos nga daeagan it programa, kamana man ro pagdumaea sa trapiko ag mga protocol sa kaeowasan para sa ginaeauman nga mabahoe nga numero it mga magatambong.
Maga-deploy man ro mga awtoridad it mga trained security personnel agud nga mapabilin ro kaayusan ag masiguro ro kaeowasan it tanan nga mga magatambong sa seremonya.
Indi pa matumod it taeatapan kon makatambong si Pangueong Ferdinand Marcos Jr., ag DepEd Secretary Sonny Angara sa okasyon agud nga pangunahan ro mass oath taking.
