KALIBO, Aklan — Gin mandu it Ombudsman-Visayas ro tatlong buean nga suspension ni Municipal Assessor Erlinda Casimero it LGU-Malay nga imaw ro may hurisdiksyon sa isla it Boracay.
Bangud raya sa kasong Simple Neglect of Duty.
May kaangtanan raya sa pag-isyu ni Casimero it dokumento kun siin gina sugid nga owa it ibang tagapagmana sa eugta it pamilya Pelayo sa Barangay Manocmanoc sa isla mag eowas sa sambilog.
Bangud kara, nagreklamo ro mga igmanghod ag gumankon it pinaborang claimant ag nagpagowa it ebidensiya nga may kinamatarung man sanda sa nasambitang eugta.
Suno sa Ombudsman, napaseawan si Casimero nga himuon ro mandatu kara kat magpagowa it gina pangayung dokumento nga owa anay nag usisa it status it eugta.
Mag eowas kara, pwede pa sigon rayang makasuhan it graft and corruption nga may mataas nga penalidad sa oras nga mapamatud-ang may kabaylu nga padya maghalin sa gin paborang claimant ro anang naging desisyon.
Presenteng naka-leave sa trabaho si Casimero ag sa Nobyembre 17 pa maiserbe kana ni Malay Mayor Ceciron Cawaling ro suspension order it Ombudsman.
