May nalipatan si President Ferdinand Marcos Jr. nga sambiton sa anang ikatlong State of the Nation Address (SONA).
Raya hay ro maayos ag permanenteng evacuation centers nga sambilog sa mga dapat iprayoridad it gobyerno bangud nga ro nasyon hay masaming ginadaeasa it kalamidad.
Kada dag-on, masobra sa 20 nga bagyo ro nagapanaeasa sa nasyon ag ro mga raya hay mapanghalit. Masami ro pagbaha, pag-eopok it bulkan ag paglinog.
Pektado ro pumueoyo sa kada nagatama ro kalamidad. Uwa sanda it masilungan sa oras it kinahang-eanon. Nauna eon nga naeomos sa maeapnagong pagbaha ro Metro Manila ag mga probinsiya sa Central, Southern ag Northern Luzon bangud sa Bagyong Carina ag habagat.
Maabo ro nagsaka sa bubong it andang baeay ag maabo ro na-rescue kapin eon ro mga nagaistar sa binit it dagat.
Gindaea sanda sa evacuation centers nga kaeabanan hay sa mga eskuwelahan ag covered court it barangay sanda nagdueotdutan. Umpisa eon ro pagbisita it mga bagyo sa nasyon ag ginaeauman nga magagrabe pa bangud sa epekto it La Niña nga maeksperyensyahan sa masunod nga buean ag magabuhay hasta sa buean it Nobyembre.
Ro pagpatindog it permanenteng evacuation centers hay nagakadapat eon nga himuon sa makaron it gobyerno. Importante raya bangud nga ro Pilipinas hay masaming ginatamaan it kalamidad.
