Ginkumpirma it Department of Foreign Affairs nga nasampwan eon nga patay ro sangka overseas Filipino nga unang nareport nga naduea matapos nga tumama ro magnitude 7.7 nga linog sa nasyong Myanmar.
Sa sangka mensahe hay hinambae ni DFA Undersecretary Eduardo De Vega nga ro biktima hay si Francis Aragon nga positibong ginkilaea.
Suno sa ahensya, napasayod eon sa pamilya it namatay nga Pilipino ro anang sinapit ag presenteng sitwasyon. Bilang pagrespeto sigon sa pamilyang namatayan hay indi anay sanda magpaguwa it iba pang mga impormasyon angot sa sinapit kara.
Ginsiguro it DFA nga magapadayon ro andang pag-usoy sa mga Pilipino nga naduea matapos ro mabaskog nga paglinog. Una kara hay ginkumpirma eon man it manghod it biktima ro impormasyon nga nakit’an eon ro eawas kara.
