Ginaingganyo ni Senador Sherwin Gatchalian ro Department of Information and Communications Technology (DICT) nga padasigon ro patuman it bilog National Fiber Backbone (NFB) project agod nga mapaeawak ro access sa libreng Wi-Fi para sa publiko, nga makabulig sa mas maabo nga tawo sa bilog nga nasyon nga makakonekta sa internet.
Suno kay Gatchalian, importanti nga mapadasig nga maimplementa ro proyekto agod nga masiguro nga tanan nga Pilipino hay makaeksperyensya it masaligan nga internet, kapin eon sa mga maeayo nga lugar ag mga komunidad nga kueang sa serbisyo.
Ginpunto pa it senador nga ro masaligan nga internet access hay indi eon dapat ikabig nga luho kundi sangka importante nga serbisyo para sa patas nga access sa edukasyon, trabaho, ag mga serbisyo publiko.
Presenteng naga salig ro gobyerno sa mga third party provider agod nga magtao it internet access sa nagakaeain eain nga proyekto it DICT kaparehas it government network project ag free public internet access project.
Apang kung kumpleto nga natapos ag na-maintain it tama ro national fiber backbone, indi eon kinahang ean nga magsalig ro gobyerno sa mga pangguwa nga provider.
Raya hay magadaea it mas masaligan, secure, ag mas maeapad nga free Wi-Fi bangod ro imprastruktura hay ginapanag-iyahan ag ginamanihar eon it gobyerno, nga magasigurado it mas maeapad nga access para sa tanan.
Ro National Fiber Backbone project, nga sangka nagapanguna nga parti it National Broadband Program nga ginapatuman it DICT, hay ginakumpuniran it pagpahaom it masubra-kumueang sa 6,275 kilometro it fiber optic cable, kaibahan ro submarine cables ag microwave radio links.
Ro Phase 1 it proyekto hay gin-eunsad ko Abril sa makaron nga dag-on, samtang ro Phases 2 ag 3, nga nagasakop sa north Luzon hasta sa Bicol ag pilang parti it Visayas ag Mindanao, hay ginahimo ag ginasaligan nga matapos sa unang parti it masunod nga dag-on.
Ro Phases 4 ag 5, sa idaeom it Philippine Digital Infrastructure Program, ay magapaeapad it koneksyon sa bilog nga Visayas ag Mindanao samtang ro Phase 6 hay makaabot sa mga pinaka-maeayo nga probinsya.
