Pinapabilis ng Department of Energy (DOE) ang pagproseso ng net metering applications bilang tugon sa problema sa suplay ng langis, kung saan inaatasan ang utilities na tapusin ito sa loob ng 10 araw at ang LGUs sa loob ng tatlong araw.
Bahagi ito ng Executive Order No. 110 na nagdeklara ng national energy emergency dahil sa tensyon sa Gitnang Silangan. Layunin ng programa na hikayatin ang paggamit ng solar energy upang mapababa ang gastos sa kuryente.
Kasabay nito, pinaigting din ng DOE ang inspeksyon sa mga gasolinahan at ang kampanya laban sa hoarding, kabilang ang mas mahigpit na monitoring at muling pagbuhay sa DOE–DOJ Task Force.
Ayon sa DOE, layon ng mga hakbang na matiyak ang sapat na suplay ng langis at maprotektahan ang mga konsyumer sa gitna ng krisis sa enerhiya.
