KALIBO, Aklan — Ginpaabot it Department of Health (DOH) nga bukon it tanan nga baeay hay nagasunod sa “search and destroy operations” ukon dengue control efforts sa Western Visayas.
Bangud kara, nagpanawagan ro DOH 6 sa mga opisyal it barangay nga i-activate ro andang Barangay Dengue Task Forces ukon Aksyon Barangay Kontra Dengue.
Nasayuran nga umpisa Enero 1 hasta Agosto 10 it makaron nga dag-on, nakalista eon it masobra sa 12,000 nga kaso it dengue ro Western Visayas ag 24 kara ro napatay.
Base sa ginpakita nga datus, nagsaka sa 142 percent ro mga kaso kumpara sa masobra 5,000 cases ko nagtaliwan nga dag-on ag 24 man ro napatay.
Ginpabutyag ni Dr. Bea Camille Natalaray, Medical Officer 4 ag head it Emerging and Re-Emerging Infectious Disease unit sa DOH Region 6, ro importansya it pag-reactivate it dengue task forces ag ro mga gin-isyu nga executive orders ukon mga ordinansa it DOH angot kara.
Ro responsibilidad it barangay task force hay ro mga masunod, regular nga clean-up campaigns ag search and destroy; pag-monitor sa pagsunod it mga panimaeay; pag-coordinate sa mga eskwelahan ag LGU’s sa implementasyon it mga aktibidades; pag-mobilize it mga resources halin sa mga barangay ag ro pagbantay ukon pag-surveillance it mga Barangay Health Workers.
Ginpabutyag it doktor nga naintindihan nana ro mga hangkat sa pagpasakop sa andang mga hilikuton apang naga apela imaw it sangkiri nga pag-intindi it mga komunidad sa importansya it andang kooperasyon sa pagkontrol sa dengue.
