Ilulunsad ng Department of Health ang measles-rubella supplemental immunization activity sa Mindanao simula Enero 19 bilang tugon sa pagdami ng kaso ng tigdas at rubella, na umabot sa mahigit 5,000 mula 2025 hanggang unang bahagi ng 2026. Prayoridad ang Mindanao dahil sa mataas na antas ng transmission sa ilang rehiyon, at isinasaalang-alang ang iskedyul upang hindi maapektuhan ang paggunita ng Ramadan.
Sasaklawin ng bakunahan ang mga batang edad anim hanggang 59 na buwan, habang magpapatuloy ang regular na pagbabakuna sa buong bansa. Nakatakda ring isagawa ang ikalawang yugto ng supplemental immunization sa Luzon at Visayas sa kalagitnaan ng taon, kasabay ng patuloy na pagpapalakas ng mga serbisyong pangkalusugan upang maiwasan ang karagdagang pagkalat ng sakit.
