KALIBO, Aklan—Ginklaru it department of labor and employment ukon DOLE-aklan nga ro pwedeng eamang makabo-oe it unemployment certificate hay ro mga empleyado nga gin-terminate ukon eubusan nga nagsarado ro kompaniya nga ginatrabahuhan.
Suno kay DOLE aklan provincial head carmela abelar nga pila sa mga requirements nga andang ginapangayu sa trabahador sa pag-isyu it nasambit nga sertipikasyon hay ro letter of retrenchemt ukon letter of termination halin sa andang management ag government issued ID.
Ro unemployment certificate hay sambilog sa mga ginapangayo nga dokumento agud nga makabaton it hasta sa P20,000 pesos nga cash benefit ro contributing members it Social Security System (SSS) nga naduea-an it trabaho.
Ro kantidad it cash benefit hay base sa andang monthly salary credit.
Gindugang pa kara nga owa sanda nagatau it sertipikasyon sa mga obrero nga ro andang ginatrabahuhan hay temporaryo eamamng nga nagsarado ukon mga workers nga sanda mismo ro nag-resign.
Makaron nga may krisis suno kana hay gina-engganyo it DOLE ro mga management nga mag adopt it nagkaeain-eain nga scheme sa flexible work arrangements agud nga malikawan ro pagpahalin it mga workers.
Ro gina-isyuhan eamang sigon nanda it unemployment certificate hay nagpasa it requirements umpisa ko marso 2019 sandig sa circular no. 2019-011 it SSS.
Antes pa sigon ro covid 19 pandemic hay may mga naga request eon it nasambit nga sertipikasyon halin sa andang taeatapan.
Pwede man sigon nga mag-email kanda kaeakip ro daywang dokumento kon indi maka-agto sa andang mga opisina.
