KALIBO, Aklan— Ginpaandaman it Department of Labor and Employment (Dole) Region 6 ro mga kompaniya sa isla it Boracay nga ipatuman eon ro wage increase sa andang mga empleyado para makalikaw sa multa.
Suno kay Cyril Ticao, director it Dole-6, importanteng masayuran it mga employers nga naging epektibo eon ro pagpataas sa sweldo it mga trabahador sa pribadong sektor sa isla ko Enero 27, 2019.
Nagpaguwa eon sigon sanda it nagakaigong abiso may kaangtanan sa pagpatuman it wage hike sa Boracay.
Gin-aprubahan ko Hunyo 2018 ro Wage Order No. 2 nga nagataeana it pagpataas it sweldo sa Boracay nga igapatuman tatlong buean matapos ro uman nga pagbukas it isla ko Oktubre.
Ginpahayag ni Ticao nga gintaw-an it kahigayunan ro mga employer nga makabangon sa an-om nga bueang Boracay closure.
Nasayuran nga kaeabanan sa mga minimum wage earners sa Western Visayas hay may dugang nga P13.50 hasta P41.50 sa adlawang sweldo umpisa ko Hulyo 12, 2018.
