KALIBO, Aklan—Nagpaandam ro Department of Labor and Employment (DOLE) kaangot sa modus agud nga maka-avail sa programa it gobyerno para sa mga nawad-an it trabaho bangud sa pagpasarado ko isla it Boracay.
Ro paandam hay ginpaguwa ni DOLE regional director Cyril Ticao matapos madiskubrehan nga pila sa mga employers sa isla hay nagata-o it certificate of employments sa mga non-employees nga bukon it kwalipikadong magbaton it Boracay Employment Program (BEEP)-Adjustment Measures Program.
Sa idaeom it nasambitang programa, ro mga apektadong regular nga empleyado sa Boracay hay makabaton it cash cards nga may P4,205 nga naka-deposito kada buean ukon 50 porsiyento it andang minimum nga sweldo kada buean sa Western Visayas sa sueod it an-om nga buean.
Gin-insister ni Ticao nga may pilang indibidwal nga nagapakuno-kuno nga employers nga nagata-o it mga dokumento kaparehas it certificate of employments, IDs ag iba pang mga papeles kabaylo it komisyon.
Sa makaron hay hugot ro ginapatigayong pag-evaluate it ahensiya sa pagbaton it mga bag-ong applications nga bukon it kaibahan sa andang profiled formal sector database.