KALIBO, Aklan— Nadugangan it limang establisyimento nga may kabilugang 45 rooms ro ginapasugtan eon it Boracay Inter-Agency Task Force (BIATF) nga makabukas it uman it andang negosyo sa isla it Boracay.
Base sa pinakaulihing listahan nga ginpaguwa it Department of Tourism (DoT), halin sa dating numero nga 353 accommodation establishments hay nagaabot eon raya sa makaron it 358 establishments nga may kabilugang 12, 952 rooms.
Una kara, waea-tuo ro pag-demolish it ahensya sa mga establisimentong nakitaan it mga pag-eabag halin kat ginpasarado it an-om nga buean ro mala-paraisong isla kon sa siin, nagapadayon pa hasta sa makaron ro rehabilitasyon.
Nasayuran halin kay Environment Secretary Roy Cimatu nga maabo pang mga establisyimento ro punterya nandang ipasarado partikular ro 11 establisyimento nga ginapanag-iyahan it mga Chinese ag Koreans.
Ro nasambitang mga establisimento hay ginasugid nga nagagamit it business signage ag menu sa mga restaurants sa Chinese characters, kon sa siin mga turistang Chinese man ro mga parokyano kara.
