KALIBO, Aklan–Ginpasiguro it Department of Tourism ukon DoT nga pagarepasuhon ro carrying capacity sa Isla it Boracay kamana man ro uman nga pagbalik it direct flights sa Kalibo halin sa Singapore.
Ro nasambit nga mga isyu hay ginpaabot it Tourism Congress of the Philippines ukon TCP sa pakikipagpueong kay Tourism secretary Christina Frasco.
Suno kay TCP vice president for Visayas Peter Tay nga nakabase sa Boracay nga bukon it balanse ro presenteng carrying capacity sa available nga room accommodations sa isla nga naga-abot sa 12,000 hasta 14,000.
Madumduman nga gintaeana it Department of Environment and Natural Resources ukon DENR ro carrying capacity sa 19,215 nga turista kada adlaw ukon kapin sa 6,405 nga arrivals kada adlaw base sa average nga tatlong adlaw nga pagpabilin sa isla.
Mag-eowas kara, nag apela man ro TCP sa posibleng uman nga pagbukas it direct flights paagto ag paguwa it Singapore.
Ginpahayag ni Tay nga ro Singapore hay makabig nga gateway para sa maabu nga mga nasyon bangud sa anang strategic location.
Ginpromisa sigon it sekretaryo nga makikipag-istorya raya sa mga airline companies may kaangtanan kara.
Sa makaron hay may daywang airline companies ro may direct flights sa Boracay halin sa South Korea pinaagi sa Kalibo International Airport.
Nagpahayag man sigon it interes si Secretary Frasco nga magabisita sa Boracay.
