Magastos ro domestic travel paagto sa mga tourist destination sa Pilipinas rason nga may pilang mga Pilipino nga mas ginapili nga mag-bakasyon sa ibang nasyon kun sa siin mas barato ro andang gastos kaysa nga maglibot sa kaugalingon nga nasyon.
Raya ro pahayag it pilang personalidad nga ginpuna ro taeatapan ni Department of Tourism (DOT) Secretary Christina Frasco angot sa sitwasyon it domestic travel nga masyadong mahae kumpara sa ibang nasyon.
Sa social media, ginpahayag ni dating Commission on Elections (Comelec) Commissioner Gregorio Larrazabal nga dapat sigon nga maghimo it pamaagi ro DOT para maging barato ro domestic flights.
Namahaean sigon ro mga Pilipino sa presyo it domestic flights rason nga mas gusto pa nanda nga magbiyahe sa ibang nasyon kun sa siin mas barato ro ginabayaran sa pamasahe sa eroplano.
Ginpamilit it dating opisyal nga dapat makumbinsi it DOT ro mga kababayan nga maging turista sa kaugalingon nga nasyon apang kabaliskaran sigon ro nagakatabu sa local tourism.
Ginpuna man it aktres nga si Bianca Gonzales ro mataas nga presyo it pagbiyahe sa Pilipinas nga mas mahal pa suno kana sa ibang bansa.
Ginpaburan man nana ro suhestiyon ni Larrazabal nga engganyuhon ro DOT nga panabaan ro presyo sa mga domestic flight paagto sa mga tourist spot sa Pilipinas.
Maabu nga netizens ro pumabor sa andang pahayag ag may mga nakipagbahin man it andang kaugalingon nga eksperyensiya sa mabug-at nga gastos sa pagbiyahe sa nasyon.
