Temporaryo nga ginpapundo it Department of Public Works and Highways ukon -DPWH-Aklan ro mga ginapatigayon nga patching potholes sa mga karsadahon sa probinsiya.
Suno kay Engr. Joey Ureta, head it maintenance section it DPWH-Aklan nga bangud sa kakueangan it pondo rason nga owa anay sanda nagapatigayon it andang maintenance activity partkular ro pagkonkreto sa mga potholes ag cracks sa mga karsadahon sa parehong Eastern ag Western section.
Apang ginklaru it ahensiya nga sangkiri eon lang ro nataeupandan nga mga buho-buho sa karsada kasunod it ginpatigayon nga inspeksyon ko buean it enero it DPWH central office.
Ingkaso suno kana nga mag-abot ro andang budget sa buean it hunyo hay uman nanda nga pagapadayunon ro potholes patching activities kamana man ro iba pang proyekto kapareho it asphalt overlay, concrete reblocking ag road widening.
Prayoridad nanda makaron ro pagkongkreto sa mga lubak-lubak nga karsada kaysa sa pagbutang it aspalto agud nga mas maging matibay.
Sa pihak nga parte, ginpahayag ni Engr. Ureta nga owa pa sanda nakabaton it instruction halin sa central office angot sa mga pagpahaum nga kinahangean nga obrahon para sa naka-abang nga La Niña.
