KALIBO, Aklan —– Nagapadayon ro imbestigasyon it pulisya sa natabong highway robbery sa Barangay Feliciano, Balete, Aklan.
Ninahan ro driver ag pahinante it delivery van matapos sampukon it martilyo ro andang ueo ag uyahon it tatlong kaeaeakinhan nga nag-hold-up kanda.
Insigidang gindaea sa ospital ro mga biktimang ginkilaeang sanday Almer Amblarena, 34, driver it van ag residente it San Jose, Antique ag Jonard Pacheco, 41, it Iloilo City.
Nagaguwa sa imbestigasyon it Balete Police Station nga sangka kakilaeang eaeaki ro nakisakay kanda, apang kat nagpanaog sa nasambitang lugar hay gin-eapitan sanda it daywang eaeaking armado it baril ag martilyo nga nagpanaog sa nakapark nga tricycle.
Nagdeklara it hold-up ro mga rason rason nga insigidang ginta-o it mga biktima ro clutch bag nga may it andang koleksyon sa pagbaligya it mga RTW’s nga nagaabot it masobra sa P228,000.
Samtang, uwa pa nakontento ro mga suspek ag ginhampak sanda it martlilyo antes nga nagpaeagyo paadto sa banwa it Banga.
Daywa sa tatlong suspek ro nakilaea it mga biktima kon siin ginatugis eon makaron it pulisya.
