Ginpaguwa it Department of Trade and Industry (DTI) ro 2024 Noche Buena Price Guide para sa 12 nga nagapangunang produkto nga masaming ginabakae it mga Pilipino kada Paskwa.
Ro mga presyong nakalista sa guide hay epektibo hasta Disyembre 31, 2024, agud masiguro ro masarangan nga presyo it mga produkto hasta sa Media Noche.
Suno sa DTI, nagapabilin nga pareho ro presyo it maabong produkto halin ko 2023, samtang ro pila hay nagnaba.
Raya hay ginakaeakipan it Ham; Queso de Bola; Fruit Cocktail; Cheese ag mga pasta.
Sa pihak kara, ginlaygayan it DTI ro mga bumaeakae nga siguraduhong usisaon ro expiration dates it mga produkto agud masiguro ro kalidad.
Gin-engganyo dugang it ahensya ro publiko nga ikonsidera ro bulk buying agud makatipid.
Ro nasambit nga price guide hay tuyo it DTI nga himuong masarangan ro mga produktong kinahang-eanon para sa masadyang pagsug-aeaw it Paskwa ag Bag-ong Dag-on it kada Pilipino.
