Kalibo Aklan —– Nagpatuman it automatic prize freeze ro Department of Trade and Industry (DTI) kasunod it proklamasyon ni Pangueong Rodrigo Duterte kon sa siin ginpaidaeom sa State of Health Emergency ro nasyon tuga it 2019 coronavirus disease (COVID-19) pandemic.
Suno kay Provincial Director Ma. Carmen Ituralde it DTI-Aklan, nagpatuman sanda it price freeze sa mga basic commodities nga ginakaeakipan it sardinas, processed milk, bottled water, coffee, instant noodles, soap detergent, purified and distilled water ag kandila.
May kaangtanan kara, hugot nanda raya nga ginamonitor agud nga masigurong uwa it negosyante nga magapamentaha sa tyempo it krisis.
Sa pag-usisa sigon it ahensya sa mga bukas nga grocery stores ag supermarkets, nagapabilin sa normal ro presyuhanay it mga nagapangunang produkto.
Ginpasiguro man ni Ituralde nga bastante ro supply it mga basic commodities sa Aklan mag-eowas eon lang sa noodles nga sangkiri eon lang ro supply sa makaron.
Samtang, ro presyo it sardinas hay nagahampang sa P15.50 hasta sa P18 pesos.
Ginpahayag dugang nga uwa man sigon sanda it nabaton nga report nga may nagakatabo nga hoarding sa probinsya it Aklan.
Apang, uwa sigon sanda nagapakampante ag sigidas ro monitoring it grupo agud nga masiguro nga may bastanteng produkto nga mabakae ro mga pumueoyo sa tyempo it krisis.
