Nagpamalibad si dating Pangueong Rodrigo Duterte nga magkomento sa pagsumite ni dating Senador Antonio Trillanes IV it transcript it anang Senate testimony sa war on drugs sa International Criminal Court (ICC).
Ginbulgar it hayagang kritiko ni Duterte nga si Trillanes sa anang X account nga naipadaea eun sigon nana sa ICC ro transcript it pagpamati sa Senado ku Lunes, Oktubre 28 kun siin nag-ako si Duterte sa extrajudicial killings (EJK) sa war on drugs.
Suno kay Trillanes, nauna eun man nga hapadaea sa ICC ro transcripts it imbestigasyon it House Quad Committee ag tanan sigon hay ginbaton nana.
Suno kay Duterte, uwa it ginhimo si Trillanes kundi magdaldal ngani indi eun nana pagsabton ro pagsumite sigon it dating senador it transcripts sa ICC.
Mag-euwas kara, uwa man nag-adto si Duterte sa imbestigasyon it QuadComm.
Ginhambae nana nga gusto nana nga mag-adto apang sa ibang kahigayunan eamang.
Ginhambae eun man sigon nana ro anang testimonya sa Senado ro mga pangutana parte sa war on drugs.
Unang nag-atubang si Duterte ku Oktubre 28 sa imbestigasyon it Blue Ribbon Subcommittee parte sa war on drugs.
Pangutana ni Duterte nga haman sigon hasta sa makaron hay uwa pa sigon nakapasaka it kaso ro Department of Justice (DOJ) kontra apisar nga mabuhay eun imaw nga nagapatay.
