POLICE Report — Gina-obserbahan makaron sa ospital ro sangka pulis matapos barilon it anang live-in partner nga sangka pulis man sa tunga it mainitan nga diskusyon sa General Santos City.
Nakilaea ro biktimang si PLt. Joseph Miasan Denaga, 50, katapo it PNP 12 Drugs Enforcement Group 12, samtang nagsurender man sa anang mga kabaro ro suspek nga si Patrolman Kamille Kaye Asuncion, 29, naka-assign sa Police Regional Office-12, ag parehong naga-istar sa Lansang Village, Barangay Sinawal, General Santos City.
Base sa report it General Santos PNP, bandang alas-8 it gabi-i natabu ro insidente sa sueod it baeay it mag-live in partner sa nasambit nga lugar.
Nagtuhaw sa imbestigasyon nga antes ro insidente nabatian it andang mga kaeapitbaeay nga nagsugid ro suspek sa biktima angot sa paglibak kana it anang mga katrabaho.
Apang, pilang minuto ro nakataliwan, gulpi raya nga nagresulta sa mainitan nga diskusyon hasta nga nabatian eon lang ro magkasunod nga eupok it baril.
Insigida man nga nagpangayo it bulig sa mga awtoridad ro mga kaepitbaeay it mag-live in partner ag naabutan ro biktima nga duguan ag may tama it bala it baril sa dughan ag butkon.
Gindaea sa ospital ro biktima para sa paunang medikasyon samtang nagsurender sa kapulisan ro suspek nga makaron hay nagapangatubang sa kasong Frustrated Homicide.
Padayun man ro ginahimo nga imbestigasyon it mga awtoridad sa nasambit nga insidente.
