NEW WASHINGTON, Aklan — Pagapasakaan it kasong frustrated homicide ro sangka eaeaki matapos nga eab-on ro anang kainuman sa sangka unit it pabahay sa Brgy. Jugas, New Washington, bandang alas-7:30 it gabi-i it domingo, Pebrero 23, 2026 nga nagtuga it lastro sa anang waea nga alima.
Suno kay P/Executive Master Sergeant Lito Bonifacio, deputy chief of police it New Washington Municipal Police Station nga natabu ro hacking incident tuga it owa pagka-ilintindihan it biktimang si Rene Rontale ag suspek nga si Randy Gavino, parehong una sa legal nga edad ag nagaistar sa nasambit nga pabahay tuga it kahilungon .
Base sa imbestigasyon antes nga natabu ro insidente hay nakaangkon it mainitan nga diskusyon ro daywa sa sangka ilimnan nga matapos nga gin-awat hay nag-uli sa andang natungdan nga baeay .
Nagpilit sigon nga nag agto ro biktima sa baeay it suspek agud kunta nga magpangayo it pasaylo.
Apang pag-abot idtu hay ginbunaean imaw it buyot nga tubular it suspek.
Mag-eowas kara, nagsueod pa gid imaw sa andang baeay ag nagbo-oe it espading, kun sa siin, naagaw it biktima ro tubular ag ginhampak man sa suspek.
Ginpahayag dugang ni Executive Master Sergeant Bonifacio nag-inuman pa ro daywa sa Brgy. Mataphao ag sa andang pag-uli hay uwa pa sanda nakuntento ag naghapit pa sangka ilimnan rason nga nadugangan pa gid ro andang ininom nga aeak.
Si Rontale hay presenteng naka-confine sa nasambit ospital para sa anang nagakaigong pagbueong samtang si Gavino hay matapos nga gin-eapatan it paunang medikasyon gilayon man nga ginrefer sa outpatient department.
