Sangka 24-anyos nga eaeaki sa Nigeria ro nakalista it world record matapos imaw nga maghampang it video games sa sueod it tatlong adlaw.
Ginkumpirma it records keeping organization nga Guinness World Records nga si Oside Oluwole o mas kilala sa alyas nga “Khoded” ro pinakabag-ong world record holder it titueong “Longest Videogame Marathon Playing a Soccer Game”.
Raya hay matapos imaw maghampang it video game nga Dream League Soccer 2023 sa sueod it tatlong adlaw.
Agud indi makaeain sa anang ikaayong eawas, ginsugtan it Guinness si Oside nga mag-angkon it limang minutong break sa kada sang oras nga paghampang it video game.
Mahimo nana nga tipunon ro break time para gamiton sa pag-idlip ag pag-adto sa comfort room.
Si Oside hay qualified biochemist pero nagatrabaho makaron bilang car dealer.
Ginhimo nana ro record attempt ngara agud makatipon it donasyon para sa ospital sa anang banwa sa Ijebu Ode, Southwestern Nigeria.
