Sangka eaeaki sa Japan ro nakalista it bag-ong world record matapos raya nga makapatubo it tanum nga clover nga may 63 nga dahon!
Ginkumpirma it records keeping organization nga Guinness World Records nga ro 45-anyos nga si Yoshiharu Watanabe ro pinakabag-ong record holder it titulong “Most Leaves on a Clover” matapos makapatubo it sangka clover plant nga may 63 leaves.
Suno sa Guinness, ro nasambit nga titulo hay sambilog sa pinakatumaeagsahon nga mapiyerde bangud nga bukon it maeumo nga makapatubo it clover nga eampas sa tatlo ro dahon.
Ro ulihing nakalista kara hay sangka eaeaki man nga taga-Japan nga si Shigeo Obara ko 2009 kun sa siin nakapatubo raya it 56 nga leaf clover.
Ro clover hay sangka klase it tanum ag may scientific name nga Trifolium repens L., nga nagakahueugan it “tatlong dahon”.
Kaibahan raya sa pamilya it Fabaceae ukon mga legumbre. Ro ordinaryong clover hay may tatlong dahon ag kon mag-eampas raya sa tatlo hay kaeabanan nga ginagamit bilang simbolo it suwerte ag proteksiyon.
Suno kay Watanabe, nag-umpisa imaw nga mag-cross pollinate it mga clover sa ugsaran it anang baeay ko 2012.
Dag-on 2020 kat maging successful imaw sa pagpatubo it clover nga 49 leaves.
Gamit raya, ginpaidaeum nana raya sa hand-pollinating ag matapos ro ap-at nga dag-on nga pag-eksperimento, nakapagpatubo imaw it 63 leaf clover.
Nagapati imaw nga nakatau raya it suwerte ag kasadyahan kana ag nagaeaum imaw nga makarondaya man ro magiging epekto kara sa mga tawong makakita kara maskin sa litrato eang.
