KALIBO, Aklan — Patay ro sangka 49-anyos nga eaeaki kat atakehon it daywang kainuman sa Cipriano Road, Brgy. Estancia, Kalibo, Aklan.
Nakilaea ro biktima nga si Joel Zonio, sangka laborer ag residente it nasambit nga lugar samtang ro mga suspek hay sanday Jayson Guardario, 31, it nasambit man nga lugar ag Antonio Isturis, 44, residente it Brgy. Taba-ao, Banga.
Suno kay P/Master Sgt. Emil Millondaga it Kalibo Police Station nga samtang nagapa-agi hay ginsampit it mga suspek ro biktima nga makipag-inuman kanda.
Apang tuga it kahilungon hay nakaangkon sanda it owa pagka-ilintindihan nga nagresulta sa pagbunae it butong ni Jayson sa likod it biktima nga sinundan man it paghampak it pala ni Antonio sa dughan.
Natumba ro biktima ag dayun nga ginguw-an it dugo sa anang dueunggan ag ilong.
Gindaea ro biktima sa sangka pribadong ospital, apang gindeklara nga dead on arrival.
Temporaryo nga sa kustodiya it Kalibo PNP ro daywang mga suspek matapos nga maaresto si Jayson sa follow-up operation samtang si Antonio hay nadakpan man pinaagi sa hot pursuit operation it Banga at Kalibo PNP sa Taba-ao, Banga.
Ro daywa hay nagapangatubang sa kasong homicide.
