Sangka eaeaki sa Sao Paolo, Brazil ro gindaea sa emergency room bangud sa infected wound kara halin sa pagretoke nga gin obra sa anang kaugalingon nga ilong!
Suno sa owa ginpangaeanan nga eaeaki nga naengganyo imaw nga retokehon ro anang kaugalingon nga ilong matapos makatan-aw it Youtube video angot sa do-it-yourself rhinoplasty.
Gamit eamang ro rubbing alcohol, anesthesia para sa sapat ag superglue, gin-operahan it eaeaki ro kaugalingon agud nga magtangos ro ilong apang matapos ro pilang adlaw hay nakaangkon it infection ro anang ilong.
Sa bulig it Campo Limpo Emergency Care Unit sa Sao Paolo, naagapan nga maging grabe ro kahalitan sa ilong it eaeaki.
Mag-eowas kara, ginpaidaeum man ro eaeaki sa mental health assessment agud nga masayuran kon ham-an nga gin-retoke nana ro anang kaugalingon.
Bangud sa raya nga hitabu, naalarma ro Brazilan Society of Plastic Surgery ag nagpaguwa sanda it statement sa publiko nga mga kuwalipikadong doktor eamang ro pweeng magpatigayo it pagretoke sa ilong.
Nagpanawagan man sanda sa Google nga boe-on ag ibawae eon sa andang video streaming site nga Youtube ro videos nga nagatau it saea nga impormasyon angot sa do-it-yourself rhinoplasty.
