KALIBO, AKLAN — Nasapwan nga uwa it sap-eot ro sangka construction worker nga naduea it pilang adlaw eon ro nakataliwan sa Sitio Ambulong, Brgy. Manocmanoc, Boracay.
Ro biktima nga nakilaea pamaagi sa nakit-ang Comelec ID sa anang kahita hay si Cerelo Sta. Ana, sa legal nga edad, sangka construction worker ag residente it Cantila Poblacion Occidental, Consulation, Cebu.
Suno sa Boracay Tourist Assistance Center (BTAC), ro biktima hay nasapwan nga uwa eon it kabuhi sa sueod it sangka bakanteng lote ag uwa it sap-eot.
Nakita sa kilid it bangkay ro sangka saewae, pares it sapatos ag sangka polo shirt.
Ginkumpirma man it BTAC nga gin-report it anang mga kaibahan sa trabaho ro pagkaduea it biktima ko Abril 26, 2017.
Sa report it Scene of the Crime Operatives (SOCO)-Boracay, uwa it nakit-ang anumang lastro sa eawas it biktima.
Presenteng gina-imbestigahan it mga kapulisan ro nasambitang insidente.
