KALIBO, Aklan—Napatay it mga pulis ro sangka eaeaki nga nag-amok bandang alas-10:20 it gabi-e sa Sitio Libas, Barangay Alas-as, Madalag, Aklan.
Nakilaea ro namatay nga si Alan Nabiong, 37-anyos, ag residente it nasambit nga lugar.
Sa interview it Bombo Radyo, ginpahayag ni Police Staff Sergeant Joemark Donato it Madalag Police Station, ginpang-eabu sigon it eaeaki ro dingding it baeay it anang tatlong kaeapitbaeay kamana man ro mga tanum nga saging sa lugar.
Pagkatapos hay nagwala sigon raya sa nasambit nga lugar kun sa siin gin-respondehan it mga pulis ro tawag it sangka Marlito Castro, bayaw ni Nabiong.
Kat magpakilaeang mga pulis samtang nga nagapatabok it suba sakay it baesa ag bitbit ro flashlight, ginhana sigon imaw nga eab-on apang ginsinggitan ni Police Master Sergeant Rufino Donato Jr., chief investigator it nasambit nga police station.
Ginkaakig raya it eaeaki ag gin-eagas si P/MSgt. Donato, rason nga napilitan nga gamiton ro anang M16 rifle, apang owa nag-eupok.
Sa ikaywang kahigayunan hay uman raya nga nagpaeupok it armas rason nga dikara eon tinamaan si Nabiong.
Kaibahan sigon nanda nga rumesponde sa lugar sanday Police Chief Master Sergeant Blas Nahil ag Police Staff Sergeant Fidelino Ricablanca Jr.
Nagpaeupok sigon sanda it andang mga baril matapos nga gina-alegar nga padayun ro pagsukoe ni Nabiong nga naging rason it pagkamatay kara.
Nadaea pa sa ospital si Nabiong nga tinamaan it bala sa anang siki ag abaga, apang patay eon kat maka-abot.
Suno sa pulisya, may mga record nga may pagka-paranoid ro eaeaki ag dati eon nga gina-reklamo it pagpang-amok.
