KALIBO, Aklan—Nagapadayon ro imbestigasyon it Batan PNP kaangot sa nakit-ang patay nga eapsag sa suba nga sakop it Sitio Himbis, Brgy. Lalab, Batan.
Una kara, ginpahayag ni Punong Barangay John Dela Cruz nga may nagreport sa anang opisina nga may nakit-an nga patay sa nasambitang lugar.
May kaangtanan kara, insigida sigon imaw nga nagresponde sa lugar ag dikara nakit-an ro nagakueob nga eapsag nga eaeaki.
Sa pag-abot it pulisya, gilayon nga ginhaw-as ro biktima ag dikara nakit-an nga naga-ungot pa ro ana nga pusod ag may pila ka mga gasgas sa eawas.
Suno pa kay Dela Cruz, ginapatihan nga ginpilak eamang ro eapsag sa nasambitang lugar bangud kon naanod raya hay bukon it sangkiri eamang nga gasgas ro anang naangkon.
Mga 24 hours pa eamang sigon nga nakaeob-eob sa tubi ro eapsag kat nakit-an raya.
Sa anang pag-usisa sa andang health officials, uwa sigon it nagpa-check-up makaron nga buean rason nga posible nga bukon it sa ana nga hurisdiksyon naga-istar ro ginikanan it onga.
Apang, uwa man nana ginaduea ro posibilidad nga nahuya eamang ro nanay kara nga masayran it anang ginikanan hasta nga nadesisyunan ro makaraya nga krimen.
Sa makaron ro eapsag hay una sa sangka funeral parlor sa banwa it Batan.
