Pilang tueog eon lang hay magabaylo eon it administrasyon.
Owa kita it ibang ginahandum kundi ro maging maayos ro transisyon, mapadayun ro mayad nga inobrahan it gobyernong Duterte ag mas mapaeapad ag madugangan pa ro mga programa ag proyekto para sa nasyon.
Masyadong importanteng makabilog ro magasueod nga administrasyong Marcos it ginatawag nga ‘economic dream team’.
Sangka economic team nga may ikasarang nga mag-draft, magsueong ag magpatuman it mga epektibong programa para sa pagbangon it ekonomiya it nasyon.
Pabor kita sa ideya nga indi dapat limitahan ro puwesto sa mga kaalyado.
Kinahangean nga maging bukas raya sa tanan basta nga mayad, maaeam, madiskarte ag tampad bilang lingkod-bayan.
Mabahoe nga papel ro pagabuytan it kada opisyal it gobyerno eabi eon sa makaron nga tiempo.
Nasayuran naton nga masyadong nabugbog ro ekonomiya halin sa nagapadayun nga pandemya tuga it COVID-19 nga gindunganan pa it mga linog ag bagyo.
Kamana man it krisis tuga it giyera sa ibang nasyon.
Makabig nga sunud-sunod ro pagsubok ag maabu ro naapektuhan.
Sa pihak kara, nagapabilin nga mabakod ro nasyon ag naeampasan naton ro sangka makasaysayan nga eleksyon.
Makaron nga magasueod eon kita sa bag-ong chapter it pagdumaea, kabay nga raya eon man ro manami nga umpisa agud nga eubusan kita nga makabangon ag maumpisahan ro pag-umwad.
