KALIBO, Aklan — Ginpaabot it sangka health expert nga ika-ap-at makaron sa pinaka-common nga klase it kanser sa mga kaeaeakin-an sa nasyon kasunod it lung ag colorectum cancers hay ro prostate cancer.
Suno kay Dr. Philip Ian Padilla, sangka health expert nga ro peligro sa nasambit nga sakit hay nagataas samtang nagaka-edad rason nga ro temprano nga pagtukib hay ro yabe agud nga malikawan.
Ginpahayag dugang nga raya hay hereditary ukon ginamana.
Posible sigon nga makaangkon it tempranong prostate ro kaeaeakin-an sa edad nga 40 kon raya hay ginamana apang kaeabanan nga nabobo-oe raya halin sa edad nga 50.
Ro sakit hay pang-siyam sa numero it mga pinakamaabung cancer nga nagakamatay sa nasyon .
Sambilog sa 100 nga eaeaki man ro posibleng mamatay bangud sa prostate cancer antes nga mag edad it 75.
Kadungan kara, gin engganyo ni Dr. Padilla ro mga kaeaeakin-an nga tempranong magpa-examine ukon magpa-screen agud nga insigidang matatapan.
Engkaso suno kana nga may diagnosis eon hay mas mabudlay nga boengon.
Padumdum nana nga sa mas tempranong pagpakonsulta hay mas mabahoe ro tsansa nga maagapan ukon malikawan ro cancer.
Nagapatigayon sigon it Prostate Cancer Awareness Month agud nga mataw-an it importansiya ro sakit.
Pwedeng madiskubre it temprano ro prostate cancer pinaagi sa pag examine sa dugo sa kaabuon it prostate-specific antigen ag digital rectal exam.
Ginpaathag pa it eksperto, makabig nga sintomas it late stage kon magguwa eon ro mga sintomas ukon may nababatyagan eon nga pagsakit it balikawang, kabudlay ukon may dugo sa pag-ihi.
Suno pa kana nga ro pag angkon it tamang impormasyon ro pinaka-importanteng armas it publiko kontra sa prostate cancer ag iba pang mga sakit.
