KALIBO, Aklan—Patay eon kat maka-abot sa Aklan provincial hospital ro sangka electrician matapos nga ayuson ro linya it kuryente sa kisame it baeay nga ginapanag-iyahan ni Balete Sangguniang Bayan Member Rhieman Villanueva, gabi-i it Martes, Oktubre 15 sa Brgy. Pob. Balete.
Ginkilaea ro biktima nga si Sol Dandoy Zonio, 46-anyos, ag residente it Brgy. Oquendo, Balete.
Suno kay P/Capt Donie Magbanua, hepe it Balete Municipal Police Station nga base sa inisyal nga impormasyon, nagaka-ayad it kuryente sa kisame si Zonio kaibahan ro anang unga ag sambilog pa.
Posible sigon nga aksidente nana nga nasag-iran ro kable it kuryente.
Insigida man raya nga gindaea sa ospital apang gindeklarang dead on arrival it nagtatap nga doktor.
Samtang, ginpahayag ni SB member Villanueva nga nakasanayan eon nanda nga patawgon ro biktima engkaso nga makaangkon it samad ro linya it andang kuryente sa baeay.
Ginpa-ayos sigon nanda ro andang napunde nga iwag sa prente it baeay, apang sa owa it swerte hay nakuryente raya.
Gin-CPR pa sigon raya it rumespondeng pilang miyembro it BFP Balete si zonio apang owa eon raya naga-response.
