KALIBO, Aklan — Sangka elf truck nga may kargang kapin sa 100 nga liquefied petroleum gas (LPG) ro tumagilid sa national highway nga sakop it Brgy. Odiong, Altavas, Aklan nga sa mayad nga swerte hay owa sumabog bandang alas-9:40 it gabi-i.
Nag-angkon eamang it minor injuries ro driver it truck nga si Zedrick Inisa, 25, residente it Brgy. Bubog, Numancia ag mga pahinante nga sanday Ryan Tabanera, 33, it Brgy. Alibagon, Makato ag Julius Cuales, 25 it Balete, Aklan.
Ro elf truck hay halin sa Iloilo ag paagto kunta sa Kalibo agud nga mag-deliver it LPG.
Suno kay P/Master Sergeant Toni Dey Lauz, imbestigador it Altavas Police Station, ginhana sigon it elf truck nga mag-overtake sa ginasundan nga saeakyan rason nga naduea-an it kontrol sa manibela ro driver.
Dikara hay nagpa-ekis-ekis ro daeagan it truck, nagtiyog it pilang beses ag tumagilid sa waea nga outer lane it karsada ag nahueog ro mga kargang LPG nga maswerteng owa nag-leak ro sambilog sa mga raya.
