KALIBO, Aklan — Mas pa nga pagapabaskugon it Boracay Inter-Agency Task Force (BIARF) ro emergency response sa isla agud nga indi eon mauman pa ro natabu nga trahedya sa pagkueob it sangka dragon boat nga ginkamatay it pitong miyembro it Boracay Dragon Force team.
Nagpaabot it pakikisimpatiya ro BIATF sa pagpanguna ni Department of Environment and Natural Resources (DENR) secretary Roy Cimatu sa mga naaywan nga pamilya it mga namatay sa trahedya.
Makikipag-angot sigon ro task force sa lokal nga gobyerno it Malay ag iba pang ahensiya agud nga makatipon it pondo para sa tanan nga apektado it masubo nga hitabu.
Sa pihak nga parte, insigidang nagtau it ayuda ro LGU-Malay sa mga biktima ag natungdan nga pamilya pinaagi sa pag-activate sa andang incident command system agud nga maasikaso ro mga bangkay, bulig pinansiyal sa pamilya ag stress de briefing halin sa Municipal Social Welfare and Development Office ag Red Cross.
Hugut nga seguridad ro ginapatuman sa makaron it Philippine Coast Guard ag maritime arm it Philippine National Police.
